الروح ملاح بيودي لفين
والشكوي طيور ملهاش جنحات
وفي برد التوهة بدون مأوي
وانا عيل لسه مجاش عشرين
والشكل بيكبر كلي آهات
سنارة عمري مهش فالحه
غير بس تنقي الدمع كاسين
كل الفترات بالوقت جروح
وانا لسه بقاوح في الفناجين
بشرب نعناع وأسكر للصبح
الناس تسمعني تقول الله
وانا بسمع نفسي واقول ده السُكر
انا نفسي أموت
باكل جلدي ف بموت م الضحك
انا سن بيدخل جوا وريد
ف يضخ علاج جوا الشرايين
الاغرب ان السن ده سم
ان قرر يدخل فيا بدوخ
ولا بعرف بعده أرتاح م الوهم
ولا حتي أعلاج مرضي الجاي
ف بقدم راحتي لكل الناس
وفي دوري بقول ربك قال حي
طب حي
الجاي أكيد أفضل بالوقت
والوقت بيخلص وانا مش حي
ده انا حتي قرايبي اللي قرايبي
ديما يشفوني يقولوا ازاي!
ف بروح علي أوضتي وأقول ازاي ؟
ف بجرح كام ورقه بإيدي
وأرميها بكل قساوة قلب
وبيتم ديما أولادهم وبكون فرحان
او بقتل أستيكت عمري
علشان ممسحش العمر الجاي
وأرجع ندمان
بطوح بهدوء القاتل
وببرطم في طلامس وجعي
وبحضر كام عفريت غلبان
علشان أشيكلهم عن أمي
ديما بتقول يصلح حالك
وانا حالي في عمره ما كان صالح
او اخويا ازاي ديما يحضن ويبوسني في خدي وبيواسي
وان صادف مره وشاف دمعي
ف يروح يتجنن علشاني
ف أضحك هستيري ومش قصدي
ف بسرعه أنسي جراحي وأعيط
او ابويا القاسي المستعبط
ديما خايف علشان مغلطش
ف يزود كف الضرب عليا
ف بروح لبعيد او بجري أغلط
أنا جدي اللي وعدني هيبقا
قبل الكلمه كان ميت فوق
ولا عاد بيزورني هناك في منامي
وان جاني بيسكت مش بيقول
أنا كلي شروخ أنا كلي جراح
أنا قصدي تمام
الروح ملاح
مش عارف هوا منين او فين
وان قولت الحق تروح متجيش
أسكت أحسن وأصرخ بهدوء
أدخل اوضتك وأرقص علي فوق
إبني في سلم
أطلع وانزل والعن في الناس
وبلاش تتعشم اوي علشان
في الاخر هتموت م الغفله
والغدره الصح اللي بتيجي
بعد ما بتأامن للزفه
التسميات :
إبداع