اتسرسبى ف كل الشوارع والدروب
واسكنى كل الخلايا والقلوب
يمكن تصيبنى نفحة من ضيك
يمكن هموم القلب...
على إيدك تدوب
مقلوب يا دنيا دفترك مقلوب
يتساوى ليه الحلو بالمعطوب ؟
يتساوى ليه الحر بالقشرة ؟
كل الوشوش فيكى بقت كشرة
ولا عادش عِشرة
وحتى الطيبة برانى
لسانى متغرب فى أوطانى
لسانى مرمي فى دايرة النسيان
بحلم أكون ... إنسان
وسيان مشيت ع الحنة أو ع الشوك
كل السكك راحه بلا راجعة
واجعة قوي ..
ياوحدتى واجعة
لا دمع ريحنى
ولا فرْح فرّحنى
حتى ملاك الموت
مش راضى يلمحنى
يا أيها المحنى
جدرك خلاص بيموت
نشفت فروع التوت
والتوت ملوش دية
إرجع بقى ياحمام على الغيه
بزيادة وكفاية ملاغيه
قلبى ما لهشى فى الهوى غيه
قلبى بينزف من كذا جيها
يانفوس رزينة وعاقلة ووجيها
لو بالخيار الدنيا م الأول
فيه ناس كتير ...
ما كانتش هتجيها .
التسميات :
إبداع