على صوت الناي
اللي بيعزف لحنه المقهور
وسواقي الشر
اللي بتغرف م الظلم بحور
ومابين اللحظة والتانية
وشراقي القلب اللي ف ثانية
بجفاف إحساسه بيتشقق
يصبح مكسور
بسراب النور اللي بيطرد ف ضلام روحنا
ياسفينة نوح جمعي فينا
وعدي المحنة
الريح مجنون .. عاصف حاير
وبينزع م القلب بشاير
لجذور الخير المزروعة جوا الشرايين
ياسنين الخوف المروية بدمع الأيام
أيام بتمر وف السكة بتدوس أحلام
ياعيون الشمس النعسانة
عن صوت الشر اللي ملانا
هو انتي مابينا موجودة
واﻻ احنا ودانا مسدودة
وعيونا دي عامية ما بتشوفشي
ضي الأحلام ...
التسميات :
إبداع