الأمل مروى بجفاف
والأمانى سنين عجاف
واللي خاف بيناجى نفسه
هوه يعنى ضرورى أخاف .. ؟
دا اللى غاوى الرقص يحجل
يزرع الورد ف قصارى
يحصد الأحلام بمنجل
بس فى الآخر .. أتارى
إن نور الشمس طافى
والجبال ساكنة ف كتافى
أوكسجينى معدتش صافى
وصدرى ضاق ع الإحتمال
النفس بأخده بمنازعه
وكل جزعه .. وراها فزعه
كل ما اسعى .. الاقى رزعه
جوه غابه م التلال
وأنا كنت فاكر إن أنا هأقدر
أحلم ....
وأزق الحلم للتحقيق
طلع اللى فاضل
م الهوان أكتر
والكدب ماشى
فى سكة التصديق
والدنيا غاويه
اللعب بالمخاليق
والميه مالحه .
إزاى نبل الريق ..؟
والضيق مسلم
خطوته للضيق
والناس غلابه
وتايهه وسط الريح
والريح بتحدف
شرد ع المجاريح
مجروح ورافض
بآهه واحدة يصيح
قانع وراضى
بهِدمه وبلقمه
كما شمس راضيه
العيشه فى العتمه
دايق مرار الصبر فى العيشه
قادر يطير لو يمتلك ريشة
ولكنه شاف ....
الأمل مروى بجفاف
والأماني سنين عجاف
واللي خاف أكّد لنفسه
إنه كان لزماً يخاف ..!!