المصريين توداي: شاعر التوتة والساقية سعد محمد الشرقاوي، موظف بأوقاف كفر الشيخ ولد بقرية نظارة مهيب بمركز سيدي سالم في أكتوبر 1961 وهو عضو اتحاد كتاب مصر.
صدرت له دواوين: شجر التوت - تحت التوت -ليالي الساقية و التوتة - وتحت الطبع عصارة الساقية و التوتة، وله العديد من اللقاءات التليفزيونية و الإذاعية، وحصل على العديد من الجوائز والتكريمات أبرزها: جائزة القوات المسلحة في الأدب 2015.
معنى الجيش
قولت لولدي حقيقة بلدي
وفيه كام معنى لإسم الجيش
لمّا تحب ترابها وتعشق
صورة نيلها مع الكورنيش
لمّا تشوف الجندي ف ليلـٌه
سايب بيتـُه وكلْ عيالـُه
ولسان حاله ساعتها يقول لك
إن الموت ما بيشغل باله
بدّل خوفك كله أمان
وأنا فى الخدمة أبات سهران
كله يهون لأجل الأوطان
يعنى أموت بسْ انت تعيش
شوف كام معنى لاسم الجيش
,,,,
جيشك شرفك هوّ سلاحك
هوّ صمودك هوّ نجاحك
هوّ الضّهر الحامي لأرضك
واللي يسطـّر مجد كفاحك
حارس خادم للأوطان
جه فى السّـُنة وفى القرآن
إوعاك تسمع أيْ جبان
بايع وطنـُه عشان بكشيش
شوف كام معنى لإسم الجيش
,,,,
جيشك يعني حدود أراضيها
وعين الدولة اللى تشوف بيها
حامى ترابها وحامي سماها
وحامي المُوجه ف ليل موانيها
جيشك دٍرْع وسهم ومدفع
شعبٌه ينادي يلبيّ ويسمع
عمرٌه ما يحني الراس ولا يركع
ضهري وسندي وغيره ماليش
شوف كام معنى لإسم الجيش
,,,,
جيشك هوّ اللي يعلـّيك
جيشك شوكة ف زور أعاديك
والليّ بيكره جيشك يا ابني
تلقاه دايما قاسي عليك
الوطنيّة يعني عطاء
يعني محبّة يعني فداء
أمّا الحاقد يا ابني وباء
دايما ياخـُد ولا يدّيش
شوف كام معنى لإسم الجيش
,,,,
جيشك وطني منـّك ليك
واهب نفسه عشان يحميك
بايت حاضن كل ترابها
صاحي وعينـُه وقلبُه عليك
والليّ يقول على جيشك عسكر
يبقى مُغيّب يبقى بيسْكر
جيشك وطني وعٌمرٌه ما فكـّر
يبْخل عنها بلقمة عيش
شوف كام معنى لإسم الجيش
التسميات :
إبداع