الليلة شوفتك ف المنام
ماعرفتش اهرب من عينيك
الأرض وَصَلِتْنِى بجدور
والشمس صحّت فيَّ نور
والسحاب مطّر ونس
وانا حد واخد ع الهروب
قضّيت حياتي مرغمة
ما اعرفش ليه من يوم لقاك
وانا تايهة فيَّ الأسئلة
اشمعنى إنت من البشرواشمعنى انا؟
مين اللي واصل نبضنا جوا السما؟
مين اللى طهَّر قلبنا ساعة الوصول
مين اللي وسَّع لك طريقي للقبول
مين عرَّفك طعم الأماني ووَصْفِها
دَلَّك عليا ودَلّ روح الكون عليك
ما اعرفش غير اتمد لك واتمد فيك
ما اعرفش غير انك أنا
يا نخل طارح من سنين
واستنى ميلي عشان يميل
فتّحت عيني المرغمين
المغرمين
الطيبين
الحالمين
المشتاقين
المهزومين
المليانين طهر وأمل
قربت لك.. قلبي اكتمل
وصالحت ويّاك الحياة
يا دفِّتي وقت الغرق
وكتفي لمّا الحمل زاد
أول بشاير ربنا لحُبِّ العباد
المرة دي شوفتك قدر
ولأول مرة باشوف الضي
ولأول مرة المس تفاصيل الروح ف عينين
واشعر بالنور من همس إيدين
واتنفس شوق وغرام وحنين
ضاع مني سنين وانا عني باحيد
يصالحني وريد على نبض وريد
وانا قلبي بطبعه ياقلبي عنيد
إنما سلِّمت خلاص للقول
الأرض البور طرحت جنة
وستاير شَعري بتتدلى
بتهفهف مع تنهيد الروح
ولأول مرة انا باعرف ابوح
مدبوح بيطبطب على مدبوح
وسامحني أنا ياما هزمت إيديك
ردّيت الحضن اللي سكنّي
صدقني ماحدش علّمني
ولا كنت افهم طبع المشاوير
الخطوة ف بُعدك كانت غير
والشجر السارح كان مَحني
ما شبكش الليل يوم فستاني
ولا مرة نَدَهْتُه.. فناداني
غمّاني وضيّع عنواني
ورماني بضعفي ف عز الخوف
ولأول مرة أنا باعرف اشوف
ولأول مرة أنا باعرف احِسّ
والنبض مابيني وبينك بس
من غير ما اتدارى ف إحساسي
من غير ما اتكفّى من الحيرة
من غير ما الغيرة تمزعني
العيب ع العمر اللي خدعني
والصبر اللي نساني ف جوفه
العيب ع القلب اللي آمِنته
وقابلتك لملم في كفوفه
واشتاق لك فيما بينه وبيني
قال إيه بالهجر بيحميني
اتاريك بتنبت من طيني
وبتطرح شوقك من عيني
وبتحلم علشان أتمنى