.jpg)
أقول لك شيه تعذبني
وتتراهن على عنادي
مافيش داعي تعذبني
وأنا باقسم معاك زادي
عشان حظي أنا اخترتك
وعند عدوّي أجّرتك
وشيلت معاك هموم حيرتك
وسايق برضه في عنادي
مافيش داعي تعذبني
وانا باقسم معاك زادي
مافيش داعي يزيد نوحي
وتبقى جروحي تعليقة
ولطموحي بابيع روحي
واجيب لك تبن وعليقة
واسايس فيك ماتتسايس
وفي الوحلة تروح دايس
بحافر عمره مايقايس
أنين صوتي اللي بينادي
مافيش داعي تعذبني
وانا باقسم معاك زادي
يامهر حصاوي متعلـّق
أنا معلـّق عليك أملي
وزيّك طوقي متعلّق
وخدتك مهنتي وعملي
أشيل عنـّك واشدّ معاك
وفي الغارزة بأزقّ وراك
وباتحاسب بكلّ غباك
ولسّه برضه مش راضي
مافيش داعي تعذبني
وانا باقسم معاك زادي
زميلك لبّسوه ميري
عايش بيعدّ أيامه
ومدّة خدمته خلصت
وبيكافئوه بإعدامه
ماجرّبتش رصاص غيري
ياجاحد نعمتي وخيري
وعاملك صاحبي وكبيري
وغايتي وأملي ومرادي
مافيش داعي تعذبني
وانا باقسم معاك زادي
ماهيش نقصاك بتدلـّع
وقاطع كلمتي ونفَسي
وشايف دمي بيولـّع
وباستولاك على نفسي
يا تصبر لمّا تتعدّل
وزهر العمر يتـبدّل
يا إمّا الحمل ح يميّل
ويومنا يبقى مش عادي
مافيش داعي تعذبني
وانا باقسم معاك زادي
ها نتحاسب تاخد كومك
تعيش عمرك على شوقك
ساعتها تشقّ في هدومك
وكلّ الخيل تدوس فوقك
هاودني وماتناحيش فيّا
وخلّي الحبكه مرفيّه
واجيب لك أحلى عربيّة
وأكربجلك على الفاضي
مافيش داعي تعذبني
وانا باقسم معاك زادي.