تحب تكون بطل قصة
و حدوتة
تحب تعيش أمل كداب
تحب تزيف الألوان قصاد عينك
تحب تنام على الأوهام
و يمشوا المجبرين ف عزاك
و تبقى هناك
و لا حاسس بقلبك حد
ووقت الشدة وقت الجد
ليه بينسوك ..
و ليه خذلوك ..
مع إنك
عملت كتير عشان يرضوا
و ليه نساي
(تعالى اشرب معايا الشاي)
و قلب جوا منه هموم
و حلي مراره لو تقدر
وولع تحت منه عودين
على راكية يفور قلبك
و تفضل بس كام شفته
و يخلص بعدها الموضوع
تحب تخش ف الممنوع
تحب تجوع ..
و ياكلوا منك الباقي
ألم و عذاب
تحب تمشي جوة سراب
و يهرب منك الماضي
يحاسب قلبك الملكوت
تحب تموت بدون داعي
و جثة روحك الشاردة في قلب الموت
فيتقفل عليها تابوت
مفيش داعي
تموت أصلا
لإنك مت من ساعتين
و فاضل مين على روحك بيتعذب
و مين عزاك .. تعالى هناك
هتلقى كل أحبابك
بياخدوا في العزا وياك
و مين أساك على نفسك
و ليه بوحك يكون للغير
بدون تفكير بيتبرمج
على موجة أمل مخنوق
تردد عشقه ليه فاضح
و مش واضح .. بقيت معتوه
تحب تتوه
يا ريتك تصحى و تركز
يا رب تفوق
التسميات :
إبداع