نشرت أشعاره بالعديد من الصحف والمجلات العربية والمصرية، ويشارك بالعديد من المحافل الأدبية، وهو عضو بنادي أدب بلطيم، وجمعية الأدب العربي بالإسكندرية.
صدر له ديوان "طعم الوطن" بالعامية، وديوان "ثورة بالخلطة" عامية وديوان "من يبادلنى السكوت" فصحى، وله تحت الطبع ديوان "أوجاع".
قصيدة "دم الأسرى"
(قامت إسرائيل بعرض فيلم يكشف
جريمة التمثيل بأسرانا)
لما تئن الأرض وتصرخ ما تدوسنيش
ما تخطيش على دم اتبحتر يوم علشانك
وعشان ما انت تعيش
دم اخواتك لسه بيشلب
وعليه نابته زهور وحشيش
لما تئن الارض وتصرخ
ما يعديش
قتل الأسرى العُزَّل أبدا ً
أبدا أبدا ما يعديش
دم الشهدا ما بيرويش
ولما تنادى الأرض عليكى
وما ترديش
فاكره يابلدى
بكده حنعيش
والدوامه سكنت هيش
ومش هنحط الطرحه على الجيش
أبدا ًماحانش ريش ، ومفيش
ولاعمر التار ، كان بقشيش
ولا يوم خوّفنا التهويش
وما ينفعش نعيش ملاطيش
مش مكسوره عنينا ولااحنا
شخشيخه وحبة حرافيش
وما ينفعش نهادن أصلا ً
نفضل لعبه فى ايد مهابيش
لازم نقطع ايد واجعانا
بمعونه وهدنة تهميش
لما تئن الأرض وتصرخ :
ما تبعنيش
لو هتساوم ، ما تلومنيش
لو هتخاف على ضهرى وتسكت
اخرك بطنى ومش هتعيش
لو هتخاف م الموت هتموت
لكن موت بكرامه تعيش
إوعى تسيب حقنا لصهاينه
ياللى ف ايدك تاخد تارنا
دى ما ينفعش معاها مماينه
وارفع راسك ما توطيش
محناش جُبنا ، ولا خفافيش
ولما تئن الارض وتصرخ
تفتكروا هنسكت كالعاده
ولا هنفضل كده دراويش
ولا اللى يعدى ما بيجيش
ولا اللى يعدى
.. ما بيجيش ؟!!!
التسميات :
إبداع
لفتة طيبة شكرا جزيلا
ردحذف