المصريين توداي: الشاعر عمرو عامر، خريج كلية الإعلام بجامعة القاهرة، وعضو اتحاد كتاب مصر، عضو عامل ب نادى ادب كفر الشيخ، له ثلاثة دواوين مطبوعة بالعامية "دموع بتملا الكادر"، "وتفاصيل الوجع"، و"4 جهات للوجع" وله تحت الطبع ديوان "بشكل اضطراري"، وكان رئيسا لنادي أدب كفر الشيخ سابقًا، وشارك في تأسيس جماعة "شجرة توت الثقافية" مع المبدع سامى أبو زيد.
الموت والخوف
الموت والمطر النازل يغسل وشِّ الخوف
الموت والمطر النازل يغسل وشِّ الخوف
ويطهَّر جرح شهيدُه
الموت وصراخ ونواح وزمان مشدود تجاعيدُه
وبإيدُه ...
يخبِّي قناع الزيف
وأيادي الشر تريد إسقاط الوطن الحر
والْحُر يريد إسقاط اللي ما بيشوف
الموت والخوف
وحروف ملضومة
بحضن ميدان الوطن ال جافَّة عينِيه بنـزيف الهمّ /
الدمّ ...
إتفجر ثورة على الأسفلت
علشان الأرض تنبِّت فيها الحرية
في ميدان ...
بتدوب أحداثه
ومقاسه مقاس القلب يساع م الناس ملايين
قاعدين ما احناش ماشيين
والإيد في الإيد ثابتين
لامِّين حلمنا بقلوب ضامين
ما احناش ضامنين نخرج من هنا
لكن آمنين
الخوف
وصراخ ونواح
واهي لقمة قليلة ما بين مينا وعبد الفتاح
واهو جانا اليوم
بنشوف قرموط يبلع تمساح
قاعدين ثابتين
الإيد في الإيد
الكتف بكتف
ولا حد قدر وسطينا يخش يشق الصف
وما بين لاتنين
اتزفّ نزيف الثورة اتزفّ
الموت
ونشيد الصبر
راح اجمَّع كل الحبر
وهـ اكتب ( مصر ) ف كل ميدان
وهـ اغطي الوطن ال كان عريان / بردان /
محتاج لأمان
و هـ امدِّ إيديَّا
واشدِّ الموت الطالع مِ الجدران
وافتح له حدود القلب بيبان
فارد دراعيني ومش ندمان
حالف لأضحي بروحي ...
أو اعيش إنسان .
التسميات :
إبداع