المصريين توداي: محمد صبحي نصر شاعر عامية وفنان مسرحي، صدر له ديوان عن الهيئة العامة لقصور الثقافة 2010 بعنوان ( مجروح قوى ) وديوان ثان 2015 بعنوان ( أموت واقف )، هو عضو عامل بنادى أدب قصر ثقافة كفرالشيخ، ونائب رئيس نادي الأدب بقصر ثقافة كفرالشيخ من 2014/2015
نصر، معلم أول تربية رياضية، وحكم كرة طائرة درجة أولى، وحاصل على الحزام الأسود فى رياضة الكاراتية من عام 1994، وحاصل على دورة إصابات ملاعب وتدليك متقدمة، وعضو الفرقة القومية المسرحية بكفرالشيخ
شاعر ومخرج مسرحى وله العديد من الأعمال المسرحية، حاصل على المركز الثانى على مستوى الجمهورية عن أشعار مسرحية المهر بمهرجان فرق الأقاليم2011، عضو مؤسس بنقابة فناني الأقاليم المصرية.
أكون شاعر ... أكون مثال
وأطوفك ف البلاد رحــــال
ألاقينى ....
كما العيل
بيبكى لو يفارقها
ويزعل لو يكون ذكرى
وتنساه البلاد والناس
وبين عهدى ....
وبين قصدى انك انتى اساس
وبين الثورة والهوجة
حاجات يامه
بتطوى فى قلوب الناس
آهات يامه
صراخ الضمه لجبينك
وتأبينك ......
ما كانش متاح
محبينك ...
بكى ونواح... وناهبينك
يعيثوا فساد فى ليل وصباح
وكارهينك ......
يدلوا لسانهم الزالف
بكل سلاح
وناكرينك ...
يزيدوا هتاف ...
عشان الكوسة والدمعة
أمام كل الأمم سامعه
وكل الخلق مجتمعه
أمام الكل سارقينك
وشايفين البكى ف عينك
وطوينك وفردينك
وخاربينها ووخاربينك
وليه هما ما حابينك
وليه عود الربيع يدبل
وتفرك فيه صوابعينهم
بضغطة فوق صوابعينك
بحبك ..... لحن أغنية
وأحبك ضل شمسية
وأحبك غنوة فرحانة ..
يغنوها الفواعلية
وأحب تكونى أمنية
ومحمة بطين أرضك
ونيلك شهد لولادك ....
ومرى يعسله شهدك
ف ضحكة عريضة من قلبك
ف لحظة شوق وحنية
أكون انسان ....
أكون فنان .....
بيرسم لوحة مشهورة
ويغزل م السما ألوان
أكون شمعة تنورلك
ضلام الليل ...
وأشوف الويل ...
لو اتهانتى ....
وبين صورتك وبين صورتى
أكون لقطة ف بروازك
أكون مسمار ف عكازك
أشد ف ضهرك المحنى
يطوحنى الهوا والريح
يمرجحنى ....
أفتش ع الأمان فيكى ....
أعليكى ....
وفوق الراس .....
أخليكى ....
ما أنا المسحور بأوصافك...
وأوصالك ...
ومين ف الدنيا أوحالك
بإنى ماليش أمل فيكى ....
ما كنت باغوص ف أوحالك
ولكن عارف المضمون
وأعديلك ضلام حالك
تعديلى شعاع النور
ألف وأدور ... كما العصفور
جناحينه يا دوب شايلاه
يعافر والهوا طواحين
لصالح مين ؟
لصالح مين أعاديكى ...
ولو كل البشر تكره ...
أنا عمرى ما أعاديكى
مسميكى الدفا والحضن
ومن فوق السبع سماوات
ورب الكون يسميكى
ويحميكى ...
وياخد من عدوينك ويديكى
شموخ وإباء ...
وعزة من الألف للياء
يفوت العام ورا التانى
وكنتى ف صمتك الملعون
ليلاتى كنت بتحسر على حالك
ليلاتى كنت بتأثر ...
يضيع مالك
وأموالك ....
ونهبوها وكان مالك
وأنا اللى كنت بتنشق
على كلمة تقوليهالى ...
تغيرى عليا وأشتاق لك
وأرجعلك وتاخدينى
فى حضن قليبك الدافى
أعود حافى ....
وسابح فى بحور عشقك
وانتى المرسى والشاطىء
وأنا الفاتح دراعينى
بخبيكى ف درا عينى
يا ساكنة ف كل تكوينى
بالف كتير وبرجعلك
ألاقينى اسير اسمك
وتنسانى الحاجات والناس
وبين شط الأمان فيكى وبين الغير
أكون رحال ..
وواهب ليكى ترحالى
وموالى وأموالى
باحب تكونى فى العالى
وغيرك تحت
فى الأوحال
هاعيش فيكى وأموت رحال
التسميات :
إبداع